Description

ହେ ବିଜ୍ଞାନମୟ ଗୁରୋ ! ମହେଶ୍ୱର  ! ଏହି ଯୋଗ ରହସ୍ୟ ତୁମରି ମୂର୍ତ୍ତିମତୀ କରୁଣା । ତୁମର ଅହୈତୁକ କରୁଣା ରାଶି ସର୍ବତ୍ର ସମଭାବରେ ବିକୀର୍ଣ୍ଣ ଥିଲେ ମଧ୍ୟ ତାହା ଭୋଗ କରିବାର ସାମର୍ଥ୍ୟ ନ ଥିବାରୁ ଆମେମାନେ ତ୍ରିବିଧ ଦୁଃଖରେ ପୁନଃ ପୁନଃ ଉତ୍ପୀଡ଼ିତ ହେଉଅଛୁ । ଏହି ଉତ୍ପୀଡ଼ନରୁ ଆମମାନଙ୍କୁ ଚିରଦିନ ପାଇଁ ପରିତ୍ରାଣ କରିବାକୁ, ଅବ୍ୟୟ-କୈବଲ୍ୟପଦରେ ଚିରପ୍ରତିଷ୍ଠିତ କରିବା ପାଇଁ ଦୁରଧିଗମ୍ୟ ଯୋଗର ରହସ୍ୟ ଉଦ୍ଘାଟନ ରୂପ ତୁମର ଏହି ଅଭିନବ ଉଦ୍ୟମ ନିଶ୍ଚୟ ହିଁ ସଫଳତା ମଣ୍ଡିତ ହେବ । ଏଥର ଆମେ ନିଶ୍ଚୟ ହିଁ ଧନ୍ୟ ହେବୁ, ଜନ୍ମ ଓ ଜୀବନ ସାର୍ଥକ କରିପାରିବୁ । ଏହି ଆଶା — ଏହି ପ୍ରତୀକ୍ଷା ହିଁ ଦୀନ ମଳିନ ଅବସନ୍ନ ହୃଦୟ ଆମମାନଙ୍କ ପକ୍ଷେ ମୃତ ସଞ୍ଜୀବନୀ ବୋଲି ବୁଝିବାକୁ ହେବ ।
ବର୍ତ୍ତମାନ ସହୃଦୟ ପାଠକମାନଙ୍କ ନିକଟରେ ଆମର ସବିନୟ ନିବେଦନ ହେଉଛି— ପାତଞ୍ଜଳ-ଯୋଗଦର୍ଶନରେ ଯେଉଁ ସବୁ ଭାଷ୍ୟ ଟୀକା ପ୍ରଭୃତି ପ୍ରଚଳିତ ଅଛି ଏବଂ ଅତି ପ୍ରାଚୀନକାଳରୁ ସମୁନ୍ନତ ସାଧକ ସମାଜରେ ଏହାର ମର୍ମାର୍ଥ ଯେଉଁଭଳି ଭାବରେ ପରିଗୃହୀତ ହୋଇ ଆସୁଛି, ତଦନୁସାରେ ଏହି ଶାସ୍ତ୍ରର ଅନୁଶୀଳନ କରିବାକୁ ଯାଇ ବିଜ୍ଞାନମୟ ଗୁରୁଙ୍କ-କୃପାରୁ ଯେଉଁ ଅପୂର୍ବ ରହସ୍ୟ ସମୂହ ଉଦ୍ଭାସିତ ହୋଇଉଠିଥିଲା, ତାହା ହିଁ ପିପାସିତ-ହୃଦୟ ସାଧକ ବୃନ୍ଦଙ୍କ ସମୀପରେ ଆଜି ‘‘ଯୋଗରହସ୍ୟ’’ ନାମକ ପୁସ୍ତକ ଆକାରରେ ପ୍ରକାଶିତ ହେଲା । ବିବାଦ ବା ପରମତ ଖଣ୍ଡନର ପ୍ରୟାସଶୂନ୍ୟ ଏହି ପୁସ୍ତକରେ ଭ୍ରମ ପ୍ରମାଦଶୂନ୍ୟ ଋଷି ପ୍ରଣୀତ-ସୂତ୍ର ସମୂହର ଅନୁଭବ ସିଦ୍ଧ ସରଳ ମର୍ମାର୍ଥ ହିଁ ବିବୃତ କରାଯାଇଛି । ଯଦିଓ ଲିପି ପ୍ରମାଣ ଏବଂ ମୁଦ୍ରାକରମାନଙ୍କ ଅନବଧାନତା ବହୁ ସ୍ଥାନରେ ପାଠକବୃନ୍ଦଙ୍କର ଅପ୍ରୀତିକର ହେବ, ତଥାପି ଆଶା କରାଯାଉଛି — ଆମର ଏହି ଦୋଷରାଶିକୁ ସେମାନେ କ୍ଷମା ଦୃଷ୍ଟିରେ ହିଁ ସହ୍ୟ କରିନେବେ । ପରବର୍ତ୍ତୀ ସଂସ୍କରଣରେ ପୁନଃ ସଂଶୋଧନ ପାଇଁ ଚେଷ୍ଟାକରିବାରେ ତ୍ରୁଟି ହେବ ନାହିଁ ।